Templates by BIGtheme NET
Home » Fehmiology » گدی نشین ملکہ عالیہ
گدی نشین

گدی نشین ملکہ عالیہ

میں گھر والوں کی نظر میں نخریلی اور شاہانہ مزاج ملکہ عالیہ ہوں۔ ان کا یہ استدلال کچھ ایسا غلط بھی نہیں مگر میں ان شخصی خصوصیات کو اب چاہ کر بھی تبدیل نہیں کر سکتی۔ ایک زمانے میں میرا بھائی مجھے گدی نشین کہتا تھا۔ حقیقتاً میں اب بھی گدی نشین ہی ہوں۔ گھر کی نشست گاہ میں میرا ایک کونہ مخصوص ہے جہاں میری فرشی نشست ہوتی ہے۔ اس جگہ ہمہ وقت دو بڑی گدیاں بچھی رہتی ہیں جن پر ٹیک لگانے کے لیے گاؤ تکیے رکھے گئے ہیں۔ ساتھ چارجنگ کے لیے ایک عدد extension لگائی گئی ہے۔ یعنی گھر بھر کے موبائلوں کے علاوہ میرے لیپ ٹاپ کی چارجنگ کا تسلی بخش انتظام موجود ہے۔ گدیوں کے ایک جانب میری پانی کی بوتل اور گلاس رکھا ہوتا ہے۔ لیپ ٹاپ کے لیے بھائی نے ایک رحل نما چوکھٹا بنوا کر دیا ہے۔ گاؤ تکیوں پر میرے رسالے اورط روزنامچہ دهرے ہوتے ہیں۔ اس ساری ترتیب کے ہمارے بچے بھی اتنے عادی ہیں کہ ساری نشست گاہ میں اودهم اور دهما چوکڑی مچی ہوتی ہے مگر مجال ہے اس کونے کی کسی چیز کو چھیڑیں. ہاں کبھی کبھار اگر میں اپنی جگہ پر نہ پائی جاؤں تو دونوں شہزادے گدیوں پر بیٹھ کر ایسے خوش ہوتے ہیں کہ کیا ہی جھولوں پر بیٹھ کر ہوئے ہوں۔
یہ ترتیب ماسوائے سردیوں کے دو تین مہینوں کے سارا سال رہتی ہے۔ میں سردیوں میں تخت پر پائی جاتی ہوں جہاں میرے اردگرد بے شمار چیزیں بکھری پڑی ہوتی ہیں۔ لیپ ٹاپ، پانی، موبائل اور چارجر۔۔۔ اس کے علاوہ اون سلائیاں اور ادھ بنے نمونوں کا ٹال۔۔۔ تخت کے ساتھ کتابوں کا ریک ہے سو دهوپ اترنے تک وہیں پڑهنا لکھنا، کھانا پینا اور کبھی کبھی سونا بھی ہو جاتا ہے۔ جب کوئی وہاں آئے تو میری اور اس کی ایک ساتھ ناک بنتی ہے۔ میری دخل در معقولات پر اور دوسرے بندے کی اس کھلارے پر جس میں اس کو بیٹھنے کی جگہ ڈھونڈنا پڑتی ہے۔
اسی طرح میری کھانے پینے کی عادات بھی انوکھی ہیں۔ پانی میرے لیے بے حد ضروری ہے۔ پانی نظر نہ آنے پر میں مرنے لگتی ہوں۔ میرے بھائیوں کے بقول، گاڑیاں ایندھن سے چلتی ہیں اور ہماری بہن پانی سے… کہیں جانا ہو تو گاڑی میں میری خاطر پانی لازمی رکھا جاتا ہے۔ باقی لوگ تھوڑی دیر کے لیے کہیں باہر جا رہے ہوں اور میں گھر پر رک جاؤں (ایسا شاذ ہی ہوتا ہے) تو بوتل میں پانی کی مقدار ضرور چیک کی جاتی ہے۔ بدیسی مشروبات کا مجھے ہرگز مت پوچھا جائے۔۔۔ بالکل نہیں، کبھی بھی نہیں۔ بچپن میں ایک بار ان کے نقصانات کے بارے میں پڑھ کر پھر ان کو ہاتھ تک نہیں لگایا۔ ایک مرتبہ میں اور بھائی کسی کے گھر گئے۔ انہوں نے وہی مشہور زمانہ کالا مشروب پیش کیا۔ بھائی فوراً بولا، سترہ سال سے یہ بوتل نہیں پیتیں۔ اس کی بات پر میری ہنسی چھوٹ گئی تھی۔ پھلوں کا رس میں پی لیتی ہوں۔۔۔ ملک شیک کوئی سا بھی ہو چلے گا، خصوصاً آم اور اسٹابری کا من بھاتا ہے۔ کیلا مجھے بہت پسند ہے۔ پھلوں کی چاٹ بنی ہو تو بھائی ڈونگا پہلے میرے سامنے کرتے ہیں کہ کیلے چن لو… خشک میوہ جات سے میں کبھی انکار نہیں کروں گی۔
کھانا کھانے میں زیادہ تجربات کرنا پسند نہیں ہے، ہاں پکانے میں بہت تجربے کیے۔ قیمہ کریلے اور ماش کی دال اچھی بنایا کرتی تھی۔ عرصہ ہوا میں نے کچھ نہیں بنایا سوائے چائے کے۔ باہر کھانے جائیں تو مختلف کھانے ضرور چکھتی ہوں۔ دالوں سے مجھے قطعی شغف نہیں ہے، پر کھا لیتی ہوں تاہم چنے اور لوبیا پھر بھی نہیں کھاتی۔ آلو کے علاوہ جو سبزی کہیں گے، کھا لوں گی۔ بھنڈی، کدو، ٹینڈے، بینگن اور کریلے پکاتی بھی اچھے ہوں۔ گوشت میں قیمہ، کباب اور باربی کیو زیادہ پسند ہے یا بھنا ہوا گوشت… آملیٹ ہر طرح کا پسند ہے۔
چائے خوش رنگ و خوش ذائقہ ہو، گرما گرم ہو اور لوازمات کے ساتھ ہو، چاہے کشمیری کلچہ ہی ہو۔ پیالی صاف اور ہلکے رنگ کی ہو۔ بڑی ہو نہ چھوٹی، مطلب جس سے میں مناسب مقدار میں چائے سے لطف اندوز ہو سکوں۔ پانی کا گلاس کانچ کا اور صاف ستھرا ہو۔ بڑا سا ہو تو کیا ہی کہنے… کھانا مناسب مقدار میں ڈالا گیا ہو، زیادہ سالن دیکھ کر میری بھوک مر جاتی ہے۔ میں کھانا رکابی میں خود نہیں ڈالتی۔ یہ کام میرے بہن بھائیوں یا بھابھی کو کرنا پڑتا ہے۔ میں کہتی ہوں کھانا ایسا ہو جیسے دیکھتے ہی کھانے کا دل کرے کیونکہ مجھے بھوک کم لگتی ہے۔ کھانے کے دوران جب پیٹ بھر جائے، میں کھانا چھوڑ دیتی ہوں۔ میرے بہن بھائیوں اور بھانجیوں کے بقول میں کھانا ضائع کرتی ہوں لیکن میں زبردستی کھا بھی لوں تو معدے میں درد ہو جاتا ہے، کبھی کبھار قے بھی ہو جاتی ہے۔ سلیقے سے چنا ہوا کھانا مزہ دوبالا کر دیتا ہے۔ سلاد ہو تو چار چاند لگ جاتے ہیں۔ میٹھا لازمی نہیں ہے۔ مجھے میٹھے میں کھیر، ٹرائفل اور فرنچ ٹوسٹ پسند ہیں۔ زردہ  خاص موقعوں پر اچھا لگتا ہے۔
فہمیدہ فرید خان

#The_Fehmiology

#FFKhan

#FFK

About Fehmeeda Farid Khan

A freelancer, blogger, content writer, translator, tour consultant, proofreader, environmentalist, social mobilizer, poetess and novelist. As a physically challenged person, she extends advocacy on disability related issues. She's masters in Economics and Linguistics along with B.Ed.

12 comments

  1. Abdul Haseeb Zahid

    آج پتہ چلا آپ کو ملکہ کیوں کہتے ہیں۔

  2. واہ واہ ملکہ عالیہ ۔۔ہم آپکے بار جان کر لطف اندوز ہوئے 🙂

  3. This post gives clear idea in support of the new users of blogging,
    that in fact how to do blogging.

  4. Howdy! I know this is kinda off topic but I was wondering if you knew where I could find a captcha plugin for my comment form?
    I’m using the same blog platform as yours and I’m
    having difficulty finding one? Thanks a lot!

  5. This post will help the internet visitors for setting up new website or even a blog from start to end.

  6. Thanks for finally talking about >گدی — نشین —
    مگر– نخریلی — اور– شاہانہ — مزاج — ملکہ — عالیہ <Liked it!

  7. Thank you a bunch for sharing this with all people you
    really recognise what you’re talking about! Bookmarked.
    Please additionally discuss with my website =). We may have a
    hyperlink alternate arrangement between us natalielise plenty of fish

  8. It’s going to be ending of mine day, except before end I
    am reading this great post to improve my knowledge.

  9. Excellent way of telling, and fastidious article to take information regarding
    my presentation topic, which i am going to present in academy.

Leave a Reply

Your email address will not be published. Required fields are marked *

*