FFK Blog Fehmeeda Farid Khan
Related Articles
کھلی آنکھ کا خواب از نازیہ رزاق
تبصرہ از فہمیدہ فرید خان
خواتین ڈائجسٹ اپریل ۲۰۲۲ء
چند سال قبل میں نے آمنہ ریاض کا نام ناول دشت جنوں پڑھا۔ اس کا آغاز جس قدر شاندار تھا، اختتام تک پہنچنے تک شدید پھسپھسا ہو گیا تھا۔ اس میں آیوشمتی کو جیسے ٹھکانے لگایا گیا، میرا تو پڑھ کر دماغ گھوم گیا۔ بعینہٖ آج نازیہ رزاق کا ناول پڑھ کر گھوما۔ آمنہ ریاض کے ناول کے بعد میں نے اپنا ناول ”مقیدِ شہر طلسم“ لکھا تھا جو اب جا کر چھپا ہے۔
ہاں تو بات ہو رہی تھی ”کھلی آنکھ کا خواب“ کی۔ دو دن پہلے آبان نے کہا کہ اس بار ادارہ نے جنوں والے دو ناول اکٹھے چھاپ دیئے ہیں، نازیہ رزاق کا ناول خواتین میں اور فہمی باجی کا کرن میں۔ اپنا ناول تو میں نے پڑھ ہی رکھا تھا۔۔۔ سو کھلی آنکھ کا خواب پڑھنے کا ارادہ بن گیا۔ نازیہ رزاق کی اس سے قبل جتنی بھی تخلیقات نظر سے گزریں، ان میں لفاظی بہترین تھی۔ مجھے یقین تھا میں ایک اچھی تحریر پڑھنے جا رہی ہوں۔۔۔ لیکن گمان ہوتے ہی ٹوٹنے کے لیے ہیں۔ چند نکات پیشِ خدمت ہیں۔
شروعات سے انجام تک سمیرا حمید کا انداز اپنانے کی بھونڈی کوشش کی گئی۔
شروع میں کبیر پر اندھا دھند توجہ دلا کر مصنفہ کردار مزید لکھنا بھول گئیں۔
کبیر کے والدین بھی جھلکی دکھا کر یوں غائب ہو گئے جیسے کرایے پر مانگ کر لائے گئے تھے۔
شائنہ فرید عرف شائے بی بی کے کردار کی عجیب کھچڑی پکی ہوئی تھی۔ آدھی زندگی اسپتال میں مدہوش پڑے رہنے کے باوجود وہ پڑھ لکھ گئی۔
رافیل عرف رافے اس کے ساتھ رہتا تھا۔۔۔ جس طرح رہتا تھا، وہ صرف جن زادہ ہی ہو سکتا ہے (بتایا بھی یہی گیا تھا) لیکن آخر میں وہ رافیل کبیر اعظم نکلا۔۔۔ نہیں مطلب ایسے کیسے؟؟
لکھنے والی نے کمال کیا تھا مگر چھاپنے والوں نے اس سے بڑھ کر ہوش مندی کا مظاہرہ کیا۔
پڑھنا ہے تو اپنی ذمہ داری پر پڑھیں آہو۔۔۔
۱۶/۰۴/۲۰۲۲
#FFKhan
#FFK
