FFK Blog Fehmeeda Farid Khan Blog for Unsolved Miseries
Related Articles
مُنہ وَل کعبے شریف
مستنصر حسین تارڑ
مستنصر حسین سے رشتہ بہت پرانا ہے۔ جب ہم چھوٹے تھے تو یہ پی ٹی وی پر صبح کا پروگرام کرتے تھے۔ تب وہ خود کو سب بچوں کے چاچا کہلواتے تھے۔ ہم اسکول جانے سے پہلے پروگرام کا کچھ حصہ ہی دیکھ پاتے تھے۔ تاہم ان کا انداز بہت اپنائیت بھرا ہوتا تھا۔ ایسا لگتا تھا وہ صرف آپ سے ہی مخاطب ہیں۔ سو میں تو بہت زمانے سے ان کی مداح ہوں۔ ان کے متعدد سفر ناموں کا چرچا سن رکھا تھا۔ دل میں بہت خواہش بھی تھی ان کو پڑھنے کی۔ مُنہ وَل کعبے شریف ان کا سفر نامہ حج ہے۔
۔
مُنہ وَل کعبے شریف میں تمام مناسکِ حج کا تفصیلی احوال موجود ہے۔ کعبہ کے طواف کی کیفیت اور پہلی بار اسے چھو کر محسوس کرنا۔ سعی کرتے وقت حضرت حاجرہ کی پریشانی کو محسوس کرنا۔۔۔ سب کچھ اتنے جامع اور خوبصورت انداز میں بیان ہوا ہے کہ آپ خود کو وہاں موجود پاٸیں گے۔ مستنصر صاحب کی ایک بہت اچھی بات ہے کہ وہ ساتھ ساتھ تاریخی حوالے بھی دیتے رہے۔ اس سے معلومات میں بہت اضافہ ہوا۔
مناسکِ حج کی بات کریں تو بلاشبہ یہ ایک مشکل اور صبر آزما فریضہ ہے۔ منٰی اور مزدلفہ میں قیام کے دوران کٹھن لمحات آتے ہیں۔ مگر ان میں بھی مزاح کا پہلو تلاش کرنا اور اتنے ہی لطیف انداز میں بیان کرنا مستنصر صاحب کا ہی خاصہ ہے۔ اس ے پہلے میں ان کی ”غار حرا میں ایک رات“ کا مطالعہ کر چکی ہوں۔ اب یہ کتاب پڑھ کر مستنصر صاحب کی قسمت پر رشک آیا۔ وہ ان مقامات تک بھی پہنچ پائے، جو نبی کریم کی نسبت سے ہمارے لیے بہت عقیدت کے حامل ہیں۔ ساتھ ہی ایک ڈر بھی دامن گیر ہوا جب انہوں نے لکھا کہ یہ سب نشانیاں اب مٹائی جا رہی ہیں۔ معلوم نہیں جب ہم وہاں پہنچیں تو یہ سب دیکھ اور محسوس کر سکیں گے یا نہیں۔
۔
مستنصر صاحب کی کتب پڑھتے ہوئے ایسا محسوس ہوتا ہے کہ وہ خود سے باتیں کر رہے ہیں یا کسی بہت بے تکلف دوست سے۔ اپنے مشاہدات بیان کرتے ہوئے وہ کسی بناوٹ کا سہارا نہیں لیتے۔ بلکہ یوں محسوس ہوتا ہے انہوں نے جو ہے جیسا ہے کی بنیاد پر آپ سے بیان کر دیا۔ مثلاً اس کتاب میں حج کے دوران اس بات پر زور نہیں ہے کہ کتنی رقت طاری ہوئی۔ اس کے بر عکس یہ بتایا کہ ایک عام انسان، ایک مسلمان کیسا محسوس کرتا ہے۔۔۔ کیا سوالات اور خیالات اس کے ذہن میں آتے ہیں، ان کو سادہ طریقے سے لکھا ہے۔
مُنہ وَل کعبے شریف ان چند کتابوں میں سے ایک ہے جس کے مکمل ہونے کا آپ کو افسوس ہو گا۔ یہ ایک ایسا سفر نامہ ہے جو کتاب میں تو ختم ہو گا مگر آپ کو شوق سفر دے کر جائے گا۔ اس کتاب کو ضرور پڑھیے۔
سدرہ جاوید کا گزشتہ تبصرہ
